CUMMARE FURMICULICCHIA...
Li cunti ti na fiata a cura di Nicola Gennachi
Lu cuntu ti la cummare furmiculicchia.
Nc’era na fiata la cummare furmiculicchia ca scupau scupau, scupau scupau e ttrua nu sordu; scupau scupau, scupau scupau e ttrau n’auro sordu; scupau scupau scupau, scupau e ttrau n’auru sordu. Mò la cummare furmiculicchia tutta cuntenta tisse:
-Cce mi ccattu, cce mi cattu ?
- mi ccattu camerelle? Uhhh no no, sinò mi chiamane cannaruta.
-Cce mi ccattu, ccemi ccattu?
-Mi ccattu nu diamante? Uhhh no no, sinò mi chiamane importante.
-Cce mi ccattu, cce miccattu?
-Mi ccattu na cuperta? Uhhh no no, sinò mi chiamane friddulusa.
-Cce mi ccattu, cce mi ccattu?
-Mi cattu nu talaru? Uhhh no no, sinò mi ticune ca fatiu.
-Ce mi ccattu, cce mi ccattu?
-Mi ccattu tuttu pane? Uhhh no no, sinò mi chiamane mangiune.
-Cce mi ccattu, cce mi ccattu ?
Mi ccattu na bella esta? Uhhh si si, cussì mi tthrou nu maritu.
E ccussi la cummare furmuculicchia si ccattau nu bellu vestitu e si mise a la finescia.
Spittau spittau e passau cumpare cane.Tisse:
-Cummare furmuculicchia pircè ta misa alla finescia?
-Ehhh ca m’aggiu mmaritarre!
-Mi vuei a mmie?
-E comu faci alla notte?
-Uhhh no no, sinò mi ddisciti alla notte!
E lu cumpare cane si ni sciu.
Spittau spittau e passau cumpare ciucciu. Tisse
-Cummare furmuculicchia pircè ta misa alla finescia?
-Ehhh ca m’aggiu mmaritarre!
-Mi vuei a mmie?
-E comu faci alla notte?
-Uhhh no no, sinò mi ddisciti alla notte!
E lu cumpare ciucciu si ni sciu.
Spittau spittau e passau cumpare iaddru. Tisse
-Cummare furmuculicchia pircè ta misa alla finescia?
-Ehhh ca m’aggiu mmaritarre!
-Mi vuei a mmie?
-E comu faci alla notte?
-Uhhh no non sinò mi ddisciti alla notte!
E lu cumpare iaddru si ni sciu.
Spittau spittau e passau cumpare surgicchiu. Tisse
-Cummare furmuculicchia pircè ta misa alla finescia?
-Ehhh ca m’aggiu mmaritarre!
-Mi vuei a mmie?
-E comu faci alla notte?
-Uhhhh cè bellu! Si si; si si cussì mi faci turmire la notte.
E cussì la cummare furmiculicchia figge trasire cumpare surgicchiu a casa e ppuntara lu matrimaniu. Poi scera a la chiesa a missa matinale e si spusara. Mo la cummare furmiculicchia, prima cu bbane a la chiesa, era misa intra la pignata nu picca ti carne e la mise a innanzi a lu fuecu cu si cucina, timotu che quannu turnavane a casa ttruavane la carne cucinata.
Quannu turnarane a casa, mentre la cummare furmuculicchia si sta lliava lu vestitu nueu, lu cumpare surgicchiu intau n’andore ca ni figgi scazzicare l’appititu. Crusitusi cumunciau a girare cu bbite di donca inia dhr’andore e bidde alla fine ca inia ti intra la pignateddhra: si bbicinau e chianu chianu cu lu pieticeddru circau cu piia nu stuezzu ti carne. Ota ti cquai e bbota ti ddrhai, cu no si bbruscia... alla fine catiu intra la pignata e morse.
Topu ca la cummare furmiculicchia s’era cangiata la esta, chiamau:
“cumpare surgicchiu! Surgicchiu! A ddo stai?”
E ma ddrhu purieddru nno putia rispunnire pircè era muertu.
“Surgicchiu! Surgicchiu!”
e la cummare furmuculicchia circava a tutti li puntuni ti la casa. E nienti. Cerca ti cquai e cerca ti ddhrai , ma cumpare surgicchiu non c’era.
Alla fine, la cummare furmiculicchia idde lu cuperchiu ti la pignata ca era catutu; vvardau intra la pignata e bbidde lu cumpare surgicchiu ientri a l’aria e cu la capu 'mpuggiata su nu stuezzu ti carne.
Disperata la cummare furmiculicchia si mise a chiangire e ddicia:
SURGICCHIU MIA SURGICCHIU
A CATUTU A 'MPINNATICCHIU
LA PETRA A 'NCAPITALE
SURGICCHIU MIA COMU A GGIU FARE?
SURGICCHIU MIA SURGICCHIU
A CATUTU A 'MPINNATICCHIU
LA PETRA A 'NCAPITALE
SURGICCHIU MIA COMU A GGIU FARE?
SURGICCHIU MIA SURGICCHIU
A CATUTU A 'MPINNATICCHIU
LA PETRA A 'NCAPITALE
SURGICCHIU MIA COMU A GGIU FARE?
altra versione del finale:
SURGICCHIU MIA SURGICCHIU
A CATUTU A 'MPINNATICCHIU
E LA PORTA NO SI APRE CCHIUI,
LU LIMMITARE TREMULA
LU sànsicu ZICCAU
LU SURGICCHIU SI 'NFUCAU
SURGICCHIU MIA SURGICCHIU
A CATUTU A 'MPINNATICCHIU
E LA PORTA NO SI APRE CCHIUI,
LU LIMMITARE TREMULA
LU sànsicu ZICCAU
LU SURGICCHIU SI 'NFUCAU
'stu cuntu ete lu 'cchiù bellu te tutti li cunti salentini. Simu d'accordu?
1 commento:
Bellissimo blog!
Posta un commento